اسكريبت جديد ( ٢ ) جراح المهرة كامله لجميع فصول بقلم الكاتبه المبدعة فاطيما يوسف

وباصص في عينيها ومش قادر ينزل عينه من عليها شكل ما يكون عيونها أسرته وملامحها بيحفرهم جواه كل ده في دقائق بس من ساعه ما دخل 
وعملت مهره التحاليل وطلبت منه ان هو يجي بالليل يستلمها
فهو طلب منها الرقم الخاص بيها او بالمعمل علشان خاطر قبل ما يجي يشوف جهزت ولا لا 
وهي اديته الرقم الخاص بتاع المعمل 
وهي بعد اما خرج كلمت نفسها وقالت 
هو ايه البني ادم ده من ساعه ما دخل وهو سرحان وغريب بجد ما شفتش حد كده قبل كده .
وبعدين كملت شغلها المعتاد بعد كل تحليل وقعدت تذاكر وبعد اربع ساعات رن التليفون فرديت عليه وقالت
ايوه السلام عليكم
مين معايا 
اول ما سمع صوتها فارس قال لها بتلقائيه 
يا نهار ابيض يعني الرقه مش في الشكل بس ده طلعت في الصوت كمان .
بعدت مهره التليفون عن ودانها واستغربت من الكلمتين اللي سمعتهم ورجعت وقالت له 
نعم يافندم 
فاق فارس من كلامه وسرحانه وقال لها 
انا بتاسف جدا يا انسه انا بتصل عشان اسال عن تحاليل الست الوالده جاهزه اجي اخدها ولا لا .
سالته عن الاسم علشان هي مش عارفه هو مين او عملت نفسها مش عارفه هو مين وقال لها 
انا اسمي فارس العربي اللي جيت انا ووالدتي النهارده الحاجه فاطمه كده عرفتينا ولا لا .
ردت عليه مهره وقالت له 
اه افتكرت حضرتك التحاليل جاهزه تقدر تيجي تاخدها .
زعل جدا لما قالت له افتكرت حضرتك كان مفكر ان هي عارفاه ومش عارف ايه اللي زعله ليه كده
قفل معاها وما فيش ربع ساعه كان قدامها بياخد منها التحاليل
فهو بياخد منها التحاليل قال لها وهو باصص جوه عينيها بعمق 
معقوله العيون الجميله دي واللي لمعتهم تسحر وتشد فيها لمحه حزن مش مفهومه يا ترى ايه سببها .
سألها السؤال ده بتلقائيه وهو مش عارف سبب انه مشدود ليها بالشكل ده ليه
اما هي قلبها دق من سؤاله بالطريقه دي ان هو ازاي عرف حزنها وقراه جوه عينيها في لحظه وردت عليه بنفس التلقائيه
الحزن هيفضل طول عمره طريقي وهيفضل ملازمني والفرح شكله خلاص خاصمني والدنيا بقت معانداني .
رد عليها فارس وقال لها وهو حزين على كلامها
بقى الوش الجميل الهادي ده والكيان الرقيق اللي قدامي ده يكون شايل في قلبه الحزن ده كله
فاقت لنفسها ولكلامه وقالت له بجديه 
كده التحاليل مع حضرتك تمام يا فندم وربنا يشفي الست الوالده اي اوامر مني ثانيه
زعل جدا انها غيرت الموضوع وما حبش انه يضغط عليها وشكرها وسابها وخرج
وسبحان الله ربنا مقلب القلوب كان داخل وهو يعمل التحاليل لوالدته وخرج بقلب مشغول بيفكر ازاي يوصل للملاك الحزين اللي ملامحه اتحفرت جوه قلبه من نظره عين 
وطبعا فارس فضل يسأل عليها اللي يعرفه واللي ما يعرفوش لحد ما عرف قصتها كلها
وفضل يلف يمين وشمال على حد قريب منها وهو يعرفه لحد ما وصل لرقمها الخاص
وبعت لها رساله على الوتساب وهو بيقول لها 
ازيك يا مهره اخبارك ايه
انا الباشمهندس فارس اللي جيت عملت لوالدتي التحاليل عندكم من اسبوعين 
انا عارف ان انت مستغربه انا جبت رقمك منين بس انا بجد عايز اتكلم معاكي وبكل احترام وادب .
وصلت الرساله لمهرة وفتحتها وقراءتها باستغراب وكلمت نفسها وقالت 
يا ترى البني ادم ده عايز مني ايه وجاب رقمي منين وارد عليه ولا ما اردش .
في الاخر بعتت له رساله وقالت له
يا ترى حضرتك جبت رقمي منين علشان تبعت لي على تليفوني الخاص 
جاوبها فارس على طول وقال لها 
اظن ان اليومين دول الواحد لو عايز رقم اي حد هيوصل له بسهوله جدا يا دكتورة مهره
وانا والله العظيم مش بتصل علشان اتسلى او اقتحم حياتك كده ولا انا من النوع اللي بيتصل يشاغل البنات وخلاص
كل اللي انا طالبه منك فرصه نتكلم فيها مع بعض شويه بكل تحضر .
ردت عليه مهره وقالت له بۏجع مالي قلبها 
انت تعرف ايه عني علشان خاطر تطلب تكلمني انا لا اصلح اني اتكلم او اتناقش مع اي حد انا باختصار حطام انثى .
اتوجع جدا من جواه علشانها هو اتاكد في الاسبوعين دول ان معجب بيها ومشدود لها جدا ومش عارف يسيطر على نفسه وقال لها
ليه بتقولي كده يا دكتوره ليه بصه للجانب الۏحش في حياتك 
ليه تسمحي لتجربه مريره تدمر لك شبابك واللي باقي من حياتك 
ما تستغربيش انا بتكلم معاكي وعارف تجربتك المريره اللي إنتي عشتيها انا بصراحه من غير لف ودوران سألت عليكي وعرفت عنك كل حاجه وما فرقش معايا كون انك مطلقه او انسه او اي حاجه
انا عايز اتكلم معاكي إنتي كمهره وشخصها مش على تجربتك السيئه اللي إنتي عشتيها لان دي ما تخصنيش ولا تخص اي حد .
مش عارفه قلبها حس بارتياح ليه لما اتكلمت معاه الكلام البسيط ده وقرأت كلامه 
لكن رجعت افتكرت انها كانت بترتاح مع عمرو كده برده وبترتاح في كلامه وخلاص هي فقدت الثقه في اي حد وردت عليه وقالت له وهي بتنهي الكلام معاه 
من الأفضل ان انت تبعد عني خالص لأني فقدت الثقه في نفسي وفي اي حد هيتعامل معايا
فانا مش هدي فرصه للحديث ولا معاك ولا مع غيرك لأني بقيت مهزوزه من جوايا وما بقيتش افرق بين الحلو والۏحش
علشان اللي عيني بتشوفهم حلوين وقمه في الجدعنه والرجوله بيطلعوا العكس خالص فلو سمحت ما تبعتليش تاني واحترم رغبتي .
ازاداد وجعه عليها وبعت لها
ليه تخلي تجربه زي دي تحطمك وتخسرك الباقي من عمرك
ليه تخلي شريط حياتك القديم في خيالك وما تمسحيهوش وما تهكريهوش من ذاكرتك 
ليه تخلي الذكريات القديمه تتحكم فيكي وتخليكي ما تفرقيش بين الۏحش والحلو 
انا عايز اتكلم معاكي
بصراحه انا مشدود ليكي من اول نظره عين حسيت ان قلبي بيناديني ليكي وبيشدني ناحيتك
حاولت اقاوم الاحساس ده يوم واثنين وثلاثه لكن ما قدرتش ولقتني بسال عليكي وبدور وراكي في كل مكان لحد ما عرفت عنك كل حاجه 
وعرفت قصتك ومأثرتش عليا وما وقفتش تفكيري فيكي ولو ثانيه بل بالعكس حسيت پخوف عليكي وعلى احساسك اللي انت عشتيه من تجربتك دي حسيت اني نفسي اروح اخنق البني ادم اللي عمل فيكي كده وفي نفس الوقت حبيت ان انتي مش مرتبطه بشخص 
انا كنت برفض اي عروسه ماما بتجيبها لي علشان مش عايز اي واحده والسلام
كنت دايما مستني النصيب اللي ربنا هيعلقني بيه وهيخليني ماسك فيه بايديا وسناني ومش عايز اسيبه 
ولما شفتك قلبي اتعلق بقلبك وحسيت ان إنتي النصيب الحلو اللي ربنا بعته لي
انا خريج هندسه الكترونيات وشغال في شركه عالميه هنا
وبجد عايز ناخد فرصه مع بعض وياريت تفكري قبل ما تردي عليا 
لأني بجد نفسي تدينا فرصه نقرب من بعض ولعل ربنا يوفق القلوب على بعضها .
قرأت مهره كلامه واستنت شويه وبعدين ردت عليه وقالت له 
حرام ان انت تظلم نفسك مع واحده زيي مش هتستفاد من المعامله معاها غير ۏجع القلب وتعب الاعصاب انا مش بني ادمه طبيعيه زي اي واحده هترتبط بيها
انا بقيت معقده من جوايا

وكرهه اي علاقه مع اي راجل مش عيبا في شخصك والله يا استاذ فارس خالص
المشكله فيا اني مش هقدر ادخل علاقه جديده وأغامر بنفسي تاني 
فالأفضل ليك ان ربنا يجمعك بواحده تكون انت اول نصيب في حياتها وتليق بيك وبمستواك .
رد عليها فارس على طول وقال لها برغبه 
مين قال ان انتي ما ينفعش تبقي نصيبي
مين قال انك مش من مستوايا 
انا شايفك ان انت تستاهلي احسن حد في الدنيا
رغم اني ما اتكلمتش معاكي اصلا بس هدوئك وروحك الحلوه اللي بتتعاملي بيها مع الناس لما شفتك في المعمل كفيله انها تحفرك جوه قلبي
غير انك حضرتي الماجستير وبقيتي دكتوره 
وحاليا بتدرسي الدكتوراه
وعايزه اعرفك حاجه مهمه كمان مش انا اللي اتنازل عن حبي وعن احساسي اللي قعدت ادور عليه سنين وما وقع قدامي وقلبي حسه وعيني بقت تدور عليه في كل مكان اني اسيبه يضيع من بين ايديا بسهوله .
انا هدي لك فرصه تفكري مره واثنين وثلاثه وعشره وتسألي واعرفي لأني مش هتخلي عنك ولا هسيبك .
بقت مهره محتاره مش عارفه تعمل ايه ولا ترد بإيه هي من جواها حاسه انه صادق لكن ترجع تكذب نفسها وتلوم نفسها انها ازاي تحكم عليه وهي ما بتعرفش تحكم على حد
وعدت الايام على مهره وفارس هو ما بيبطلش تفكير فيها وهي نسيت كلامه أصلا وما بتحاولش انها تفكر فيه علشان موضوع الجواز ده منتهي بالنسبه لها لحد ما في يوم بتقلب في فيسبوك بتاعها ولقت فارس باعت لها طلب صداقه
فكرت شويه وبعدين قبلت الطلب وهي مش عارفه سبب قبولها للطلب ايه 
وعدت عليها الأيام وفارس سايبها وما بيبعتلهاش خالص وهي طبعا فكرت وجه في بالها ان هو راجع نفسه ولقى ان هي ما تنفعهوش
فبصت على فيسبوك لقيته منزل منشور وكاتب فيه وقرأته بصوت عالي كان محتواه 
ساعات بنقابل ناس صدفه وبتبقى اجمل صدفه بتتحفر في قلوبنا وعمرها ما بتتنسي
وبيفضل مكانهم في قلبنا معلم مهما كانوا بعاد ومش كل يوم الواحد يقابل حد مكانه يعلم في القلب فعلشان كده مش هنفرط فيهم بسهوله ولا هنسيبهم 
ومن بعدهم صوتهم بيوحشنا واحساسهم بيوصل لنا وضحكتهم مرسومه في قلبنا ومخليانا مكملين 
وكلامي هنا مقصود لملكه القلب ومليكته وحط جنب الكلام حرف بالانجليزي وجنبه قلب .
كلامه اثر في قلبها واتحفر جواه بس برده مهزوزه فقررت ان هو لو كلمها تاني تبعته لباباها وهو اللي يقرر وهتعمل اللي هو هيقول عليه مش هتغلط الغلطه دي تاني هو ادرى منها بالحلو والۏحش .
وما كملتش تفكيرها كتير بصت لقيته باعت لها رساله وبيقول لها فيها 
طبعا مفكراني ان انا مطنشك ورجعت في كلامي معاكي واني كنت بقول اي كلام وخلاص
انا بس سبتك تفكري براحتك وتدوري الموضوع في دماغك بدون ضغط مني لاني ما مقتنعتش بمقوله الزن على الودان امر من السحر 
يا ترى لسه قلبك محنش على فارس عشان تدي له فرصه ان احنا نقرب 
انا بجد نفسي ناخد فرصه مع بعض من الاخر انا نفسي تكوني ليا يا احلى مهره شافتها عينيا .
ابتسمت بحالميه وجاوبته بكلمتين اثنين وقالت له 
تقدر تيجي تتقدم لبابا واللي هو يشوفه يقول عليه انا هنفذه بالحرف الواحد .
طار فارس من الفرحه وما فيش يومين وكان متقدم لمهره وبعت والده يكلم والدها وطلعوا يعرفوا بعض من زمان وكانو اصحاب بس السنين لهيتهم وما بقوش يشوفوا بعض 
طبعا ابو مهره سال عن فارس بدقه ناس كثير جدا وكلهم اجمعوا انه محترم جدا وشاب خلوق وعلى تدين
وبلغ بنته وقال لها 
انتي دلوقتي يا بنتي اتقدم لك عريس وما رضيتش اقول لك عليه الا لما اسال كويس جدا مره واثنين وثلاثه والحق يتقال الشاب طلع متدين وعلى اخلاق عاليه فتوكلي على الله وانسي الماضي الأليم اللي انت عشتيه وتقدمي في خطوتك بكل ثقه في الله .
سمعت مهره كلام والدها واتخطبت له واول فارس ما قعد معاها اول قاعده قال لها وهو باصص في عيونها بكل الحب والتمني 
القمر إللي لما يطل الطلة كله يقول ماشاء الله إيه الحلاوة والجمال ده ياقلب الفارس ونبضه
وكمل بوله
مبروك لقلبي إللي نال أحلي مهرة مبروك لينا ياحبيبي.
دق قلبها بوتيرة سريعة جدا وردت بإستحياء
الله يبارك فيك يافارس .
ردد هو بدعابة
ياعيني عليك يافارس من أول دقيقة ودبت آمال هتستني الست شهور دول بحالهم إزاي 
بصت له بابتسامة وهي بتفرك ايديها بخجل
وما قدرتش تنطق ولا كلمه وترد علي كلامه
بص لها بتساؤل 
مبسوطة يامهرتي 
رفعت راسها علي إستحياء وعيونها جوه عيونه وقالت
مبسوطة جدا يافارس ربنا يبارك لي فيك ويكمل لنا على خير يارب .
رد عليها فارس وقال لها
ياه ما كنتش مصدق اني احب وادوب واعشق بالشكل ده ربنا يخليكي لقلبي ويحفظك يا مهره الفارس .
فركت مهرة ايديها بتوتر وقالت له بعمق
هتحافظ علي قلبي يافارس ومش هتجرحه لأن مهرة انجرحت أوي 
قالت الكلام ده ولمعه الدموع في عينيها .
فارس لمح الدموع في عينيها وقلبه اتقطع علي جراح مهرته وجاوبها بكل صدق وحنان وحب 
أوعدك إنك هتبقي الأولي والأخيرة في قلب الفارس 
أوعدك إني مش هخليكي تنزلي دمعه من عنيكي ولا هجرحك وهعاملك بما يرضي الله 
وكمل كلامه بأمر ليها
بس أمانه عليكي مش عايز اشوف الدموع دي تاني كفاياكي ۏجع ودموع واردمي علي جراح المهرة بقلب حديد .
اتنهدت بارتياح لكلامه وحنانه وابتسمت له براحة 
وكملت مهره مع فارس واتجوزوا واخذت الدكتوراه وعاشوا
حياتهم في هدوء وراحه بال وكان فارس العوض الجميل اللي ربنا بعته لها .
انتهي الاسكريبت
جراح المهرة
بقلمي فاطيما يوسف